2012-12-02

MAGİYA ictimai birliyi 01-02 dekabr tarixlərində Lənkəran şəhərində AB Qala otelində “Regionlardan olan gənclər üçün liderlik məktəbi” layihəsi çərçivəsində 20 nəfər gənc üçün sonuncu 2 günlük təlim kursunu təşkil etmişdir. Təlim kursunda 10 nəfər qız və 10 nəfər oğlan iştirak etmişdir. Təlim kursunda təşkilatın heyətindən başqa iki nəfər yerli təlimçi – Lənkərandan olan Samir Axundov və İlkin Muradov da iştirak etmişdir. Təlim kursunda heyətlə iştirakçılar arasında liderlik bacarıqları ilə əlaqədar bir çox mövzular – “Gənc və icma anlayışı, icmaların inkişafında gənclərin yeri, icmalar və icmalaşma, icmalar və yerli problemlər, icma əsaslı problemlərin müəyyənləşdirilməsi və onların həlli yolları, icma əsaslı layihələr və onların yazılması qaydası, büdcə və onun strukturu, büdcədə şəffaflıq və töhvə, fandreyzinq, qrant və donor anlayışları, sosial-koorporativ məsuliyyət anlayışı, tərəfdaşlıq və əməkdaşlıq məsələləri, kompüter və kompüterləşmə, elm və təhsildə İnformasiya Kommunikasiya Texnologiyalarının tətbiqi, internet və şəbəkələşmə, sosial şəbəkələr” müzakirə olunmuşdur. Təlim ərzində heyət müxtəlif rol oyunları, interaktiv qrup işləri, fokus qrup müzakirələri, beyin həmləsi, debatlar və təqdimatlar kimi bir çox təlim metodlarından geniş istifadə etmiş və bütün sessiya ərzində mövzularla bağlı bir-çox sosial çarxlar izlənilmişdir. Təlim kursunun sonunda iştirakçılara müvafiq sertifikatlar təqdim olunmuşdur. Həmçinin iştirakçılar və təşkilatçılar layihə ilə bağlı öz fikirlərini bildirmiş, regionlardan olan gənclər üçün belə bir layihənin reallaşdırılmasını təmin etdiyi üçün donora – Azərbaycan Respublikasının Gənclər və İdman Nazirliyinin yanında Gənclər Fonduna təşəkkür etmişlər.